“WT Diamond Games” musobaqasida taekvondochilarimiz yana oltin medalga erishishdi
Janubiy Koreyaning Muju shahrida bo‘lib o‘tayotgan “WT Diamond Games” xalqaro taekvondo musobaqasining ikkinchi kuni ham yurtdoshlarimiz uchun muvaffaqiyatli yakunlandi.
Mikst dasturida ishtirok etgan asosiy jamoamiz — Diyorbek To‘xliboyev, Shuxrat Salaev, Shabbona Abduvalieva va Svetlana Osipovadan iborat to‘rtlik — Indoneziya va Mo‘g‘uliston terma jamoalarini mag‘lub etdi. Finalda Qozog‘iston ustidan qo‘lga kiritilgan ishonchli g‘alaba jamoamizga oltin medalni taqdim etdi.
Ikkinchi jamoa — Ozodbek Mamadaliev, Yodgor Juraboyev, Sevinch Haydarova va Ozoda Sobirjonova — Singapur va Janubiy Koreya jamoalarini mag‘lub etdi. Ammo yarim finalda Qozog‘istonga imkoniyatni boy berdi. Uchinchi o‘rin uchun kechgan bellashuvda terma jamoamiz Marokash ustidan g‘alaba qozonib, bronza medalni qo‘lga kiritdi.
Shu tariqa, O‘zbekiston terma jamoasi hisobida hozircha 2 ta oltin va 1 ta bronza medal mavjud. Oldinda esa yakkalik bahslar turibdi.
