Voleybol bo‘yicha xalqaro toifadagi hakamlikka nomzodlar uchun mo‘ljallangan maxsus o‘quv kursining tantanali ochilish marosimi bo‘lib o‘tdi
Voleybol bo‘yicha xalqaro toifadagi hakamlikka nomzodlar uchun mo‘ljallangan maxsus o‘quv kursining tantanali ochilish marosimi bo‘lib o‘tdi.
Tadbir mazmuni va tashkilotchilik darajasi bilan ishtirokchilar hamda mehmonlarda katta taassurot qoldirdi. Ochilish davomida soʻzga chiqqan Federatsiya raisi oʻrinbosari Jamshid Fayziyev, bosh kotib Farhod Alimov, Xalqaro aloqalar boʻlimi boshligʻi Samandar Badalov hamda Osiyo Voleybol Konfederatsiyasi (AVC) hakamlar kommiteti a’zosi Shahmiri Mohammed ishtirokchilarga boʻlgʻusi xalqaro hakamlarga omad tilashdi.
Mazkur nufuzli tashabbus doirasida AVC tomonidan hakamlar malakasini oshirishga qaratilgan sermazmun o‘quv mashg‘ulotlari tashkil etiladi. Ushbu kursga 9 ta davlatdan 22 nafar tajribali va istiqbolli hakamlar tashrif buyurib, bilim va tajriba almashish imkoniyatiga ega bo‘lishadi.
Kurs davomida ishtirokchilar quyidagi yo‘nalishlarda chuqur bilim va amaliy ko‘nikmalarni egallaydi:
Xalqaro voleybol qoidalarining so‘nggi yangilanishlari va ularning amaliy talqini.
Amaliy hakamlik bo‘yicha maxsus treninglar, o‘yin jarayonidagi murakkab holatlarni baholash metodikasi.
Tajribali instruktorlar, ekspertlar va FIVB darajasidagi mutaxassislar bilan bevosita muloqot va tajriba almashinuvi.
O‘yin boshqaruvi, kommunikatsiya, psixologik tayyorgarlik kabi zamonaviy hakamlik kompetensiyalarini mustahkamlash.
Ushbu o‘quv dasturi Markaziy Osiyoda voleybol sporti rivojiga katta hissa qo‘shishi, yangi avlod professional hakamlarining shakllanishiga xizmat qilishi bilan alohida ahamiyat kasb etadi.
