Vatan qalqoni va an’analar qudrati: vatanparvarlik tadbirlarida kamondan otish
O‘zbekiston Respublikasi Qurolli Kuchlari tashkil etilganining 34 yilligi munosabati bilan mamlakat bo‘ylab «Milliy armiya — Vatan qalqoni, tinchligimiz posboni» shiori ostida vatanparvarlik tadbirlari o‘tkazilmoqda. Ushbu tadbirlar dasturida kamondan otish sport turi bo‘yicha mahorat darslari muhim o‘rin egallab, sport, tarbiya va yoshlarning Vatan himoyachilari bilan jonli muloqotini uyg‘unlashtiruvchi samarali maydonga aylanmoqda.
Mazkur mahorat darslari Milliy gvardiyaning hududiy boshqarmalari harbiy xizmatchilari hamda Kamondan otish federatsiyasi mutaxassislari tomonidan tashkil etilmoqda. Bunday uchrashuvlar davomida yoshlar va o‘smirlar nafaqat eng qadimiy sport turlaridan biri bilan tanishadilar, balki Vatan himoyachisi kasbi, vatanparvarlik, harbiy burch va yurtga sadoqat tushunchalari haqida ham muhim ma’lumotlarga ega bo‘ladilar.
Shuningdek, kamondan otish sport turining tarixi, milliy madaniyatimizdagi o‘rni hamda bugungi kundagi rivoji haqida batafsil ma’lumotlar beriladi. Ishtirokchilarga asosiy qoidalar, xavfsizlik talablari, to‘g‘ri turish holati, mo‘ljalga olish va otish texnikalari tushuntiriladi. Amaliy mashg‘ulotlar esa har bir ishtirokchiga o‘z kuchini sinab ko‘rish va dastlabki ko‘nikmalarni egallash imkonini beradi.
Xususan, Samarqand viloyatida Milliy gvardiya boshqarmasi bazasida o‘tkazilgan mahorat darsi yoshlar ishtirokida yuqori saviyada tashkil etildi. Tadbir davomida nazariy bilimlar berilib, ular amaliy mashg‘ulotlar orqali mustahkamlandi.
Namangan viloyatida esa Milliy gvardiyaning mas’ul ofitserlari tomonidan Davlatobod tumani 56-maktabning yuqori sinf o‘quvchilari uchun kamondan otish bo‘yicha mahorat darsi tashkil etilib, unda o‘quvchilarda Vatanga muhabbat va himoyachilarga hurmat tuyg‘ularini shakllantirishga alohida e’tibor qaratildi.
Buxoro viloyatida Milliy gvardiya boshqarmasi va shahar sport boshqarmasi hamkorligida Buxoro davlat universiteti talabalari ishtirokida kamondan otish bo‘yicha mahorat darsi o‘tkazildi. Mazkur tadbir O‘zbekiston Respublikasi Qurolli Kuchlari tashkil etilganining 34 yilligi hamda 14-yanvar — Vatan himoyachilari kuni munosabati bilan tashkil etildi.
Bunday tashabbuslar yoshlar o‘rtasida harbiy-vatanparvarlik ruhini mustahkamlash, sog‘lom turmush tarzini targ‘ib etish hamda milliy sport turlariga bo‘lgan qiziqishni oshirishga xizmat qiladi. Milliy gvardiya va Kamondan otish federatsiyasi o‘rtasidagi hamkorlik sport orqali intizom, jasorat va Vatanga muhabbat kabi yuksak fazilatlarni tarbiyalashda muhim ahamiyat kasb etmoqda.
