Uchko‘prik tumanida sport maktabi binosi tantanali ravishda foydalanishga topshirildi
Farg‘ona viloyati Uchko‘prik tumanidagi sport maktabi kapital ta’mirdan so‘ng foydalanishga topshirildi. Mazkur loyiha Tashabbusli byudjetning 2-mavsumi doirasida aholining ovozi bilan g‘olib chiqqan bo‘lib, unga 1 milliard 360 million so‘m mablag‘ yo‘naltirilgan.
Ta’mirlangan sport maktabining ochilish marosimida tuman hokimi Qudrat Erkaboev, viloyat sport boshqarmasi boshlig‘ining o‘rinbosari Jahongir Maripov, keng jamoatchilik vakillari, sportchilar va murabbiylar ishtirok etishdi.
Marosimda tuman hokimi maktab jamoasiga ramziy kalitni topshirdi. Shuningdek, qatnashchilar sportchilar uchun yaratilgan sharoitlar bilan yaqindan tanishishdi.
Tadbirda Qudrat Erkaboevning sport sohasiga qo‘shgan hissasi alohida ta’kidlanib, unga O‘zbekiston sport vazirligining tashakkurnomasi va esdalik sovg‘alari topshirildi.
