Toshkentdagi JCh-2024: tayyorgarlik bosqichi muhokama qilindi
24 iyuldan 3 avgustgacha Toshkentda voleybol bo‘yicha 19 yoshgacha bo‘lgan yigitlar o‘rtasida jahon chempionati o‘tkaziladi. Shu munosabat bilan O‘zbekiston Milliy olimpiya qo‘mitasida musobaqaga tayyorgarlik bo‘yicha yig‘ilish tashkil etildi.
Tadbirda MOQ Bosh kotibi Oybek Qosimov, mamlakat voleybol federatsiyasi rahbarlari va volontyorlar xizmati vakillari ishtirok etdi. Unda tayyorgarlik ishlari, tashkiliy masalalar hamda turnirni yuqori saviyada o‘tkazish yuzasidan muhokamalar olib borildi.
Yig‘ilishda ilgari o‘tkazilgan xalqaro musobaqalar tajribasi asosida turnir ishtirokchilari va mehmonlar uchun qulay muhit yaratish, xizmat ko‘rsatish sifati hamda infratuzilmani xalqaro talablarga moslashtirish zarurligi qayd etildi. Volontyorlar faoliyatini muvofiqlashtirish va har bir vazifani nazoratda ushlab borish bo‘yicha mas’ullarga aniq topshiriqlar berildi.
