Toshkentda para yengil atletika bo‘yicha xalqaro hakamlarni tayyorlash kursi start oldi
Poytaxtimizdagi "Olimpiya shaharchasi"da bugundan Butunjahon para yengil atletika tashkiloti hamda Osiyo Paralimpiya qo'mitasi mutaxassislari ishtirokida para yengil atletika bo'yicha xalqaro hakamlik kursi boshlandi.
Ushbu o‘quv kursi 3 kun davom etib, unda 60 nafar mutaxassis ishtirok etadi. Dastur doirasida ishtirokchilar para yengil atletika qoidalari, hakamlik mezonlari hamda xalqaro standartlar asosida bilim va ko‘nikmalarini oshirishadi. Seminar davomida mutaxassislarga musobaqani boshqarish, bellashuvlar jarayonida e’tibor qaratiladigan asosiy jihatlar va tamoyillar, shuningdek, amaldagi qoidalar atroflicha tushuntirilmoqda. Ishtirokchilarga musobaqalarni adolatli va shaffof tashkil etish, hakamlik faoliyatida xolislikni ta’minlash hamda xalqaro talablarga muvofiq ish olib borish bo‘yicha amaliy ko‘nikmalar berilmoqda.
Mazkur kurs mamlakatimizda para sportni yanada rivojlantirish, malakali hakamlar zaxirasini kengaytirish va xalqaro musobaqalarni yuqori saviyada o‘tkazishga xizmat qiladi.
