Superbet Chess Classic Romania: Nodirbek Abdusattorov Alireza Firuzjaga qarshi o‘yinda durang qayd etdi
2025 yil 15 may kuni Buxarest shahrida bo‘lib o‘tgan Superbet Chess Classic Romania turnirining sakkizinchi turida o‘zbekistonlik grossmeyster Nodirbek Abdusattorov fransuz shaxmatchisi Alireza Firuzjaga qarshi qora donalarda o‘ynab, durang natijaga erishdi. Bu natija bilan Abdusattorov 4 ochko jamg‘arib, turnir jadvalida yetakchilardan yarim ochko ortda qolmoqda. Hozirda Fabiano Karuana, Alireza Firuzja, Maksim Vashye-Lagrav va R. Pragannandax 4,5 ochkodan to‘plab, peshqadamlikni saqlab turishmoqda.
Turnirning to‘qqizinchi va so‘nggi turi 16 may kuni bo‘lib o‘tadi. Unda Nodirbek Abdusattorov AQShlik grossmeyster Uesli Soga qarshi oq donalarda o‘ynaydi.
Superbet Chess Classic Romania turniri Grand Chess Tour 2025ning ikkinchi bosqichi bo‘lib, 10 nafar elita grossmeysterlar ishtirokida yakka davra tizimida o‘tkazilmoqda. Turnir g‘olibi 100 000 AQSh dollari miqdoridagi mukofotga ega bo‘ladi.
