Superbet Chess Classic: Abdusattorov peshqadamga qarshi muvaffaqiyatli o‘yin o‘tkazdi
Buxarest, Ruminiyada davom etayotgan klassik shaxmat bo‘yicha nufuzli Superbet Chess Classic Romania turniri qizg‘in pallaga kirdi. Bu Grand Chess Tour 2025 doirasidagi dastlabki bosqich hisoblanadi. Musobaqa mukofot jamg‘armasi 350 ming dollarni tashkil etib, g‘olib 100 ming dollar egasiga aylanadi.
Dunyoning eng kuchli grossmeysterlari qatorida o‘zbekistonlik Nodirbek Abdusattorov ham asosiy sovrin uchun kurash olib bormoqda. Kecha bo‘lib o‘tgan 6-turda u peshqadamlardan biri — fransiyalik Maksim Vashye-Lagravga qarshi qora donalarda durang qayd etdi va muhim ochko qo‘lga kiritdi.
Abdusattorov hozircha g‘alaba qayd etmagan — u 5 marta durang o‘ynagan, bir marta mag‘lub bo‘lgan. Ayni vaqtda 2,5 ochko to‘plagan grossmeysterimiz musobaqa jadvalida 9-pog‘onada bormoqda.
Bugungi 7-turda Nodirbek oq donalarda Polsha vakili Yan-Krishtof Dudaga qarshi taxtaga chiqadi. Qizig‘i, Duda ham shu paytgacha 2,5 ochko to‘plagan.