Sportchilarimizning joriy yilgi xalqaro musobaqalardagi ishtirokiga Ruslan Nurudinov start beradi
25-apreldan boshlab Samoaning Apia shahrida og‘ir atletika bo‘yicha nufuzli xalqaro musobaqa — Universal Weightlifting Cup bo‘lib o‘tmoqda. Mazkur turnir Osiyo mintaqasining yetakchi sportchilari uchun yilning eng muhim startlari — Osiyo o‘yinlari hamda Jahon chempionati oldidan muhim tayyorgarlik bosqichi sifatida e’tirof etilmoqda.
Musobaqaning eng katta qiziqish uyg‘otayotgan yo‘nalishlaridan biri — -110 kg vazn toifasidagi bahslar bo‘lib, unda ikki yirik atlet — hamyurtimiz Ruslan Nurudinov va Artyom Antropov o‘zaro kuch sinashadi. Olimpiada va jahon chempioni, rekordchi sifatida tanilgan Nurudinov hamda 2024-yilgi jahon chempioni Antropov o‘rtasidagi qarama-qarshilik turnirning markaziy voqealaridan biriga aylanishi kutilmoqda.
Turnir yuqori sovrin jamg‘armasi bilan ham ajralib turadi. Mukofotlar jamoaviy natijalar hamda individual ko‘rsatkichlar asosida taqsimlanadi.
Eslatib o‘tamiz, hamyurtimiz Ruslan Nurudinov musobaqadagi ishtirokini 2-may kuni boshlaydi. Sportchimizga omad va zafarlar tilab qolamiz hamda Nurudinovdan yuqori natijalar kutib qolamiz.
