Sirdaryoda “Yangi O‘zbekiston – Olimpiya cho‘qqilari” musobaqasining mintaqaviy bosqichi qizg‘in davom etmoqda
Guliston tumani sport maktabida Prezidentimiz tashabbusi bilan mamlakat bo‘ylab ommaviy tarzda o‘tkazilayotgan “Yangi O‘zbekiston – Olimpiya cho‘qqilari” musobaqasining taekvondo WT yo‘nalishi bo‘yicha mintaqaviy bosqich bellashuvlari bo‘lib o‘tdi.
Tantanali ochilish marosimida Guliston tumani hokimi Olimjon Jo‘rayev, viloyat sport boshqarmasi boshlig‘i o‘rinbosari Dilshod Daniyarov, O‘zbekiston Milliy Olimpiya qo‘mitasining Sirdaryo viloyati bo‘limi ijrochi direktori Bahodurxo‘ja Eshonov, O‘zbekiston taekvondo WT assotsiatsiyasining hududlar bilan ishlash bo‘yicha mas’uli Husniddin Xo‘jamqulov hamda tegishli tashkilotlar rahbarlari, yosh sportchilar va murabbiylar ishtirok etdi.
Bellashuvlarda Sayxunobod, Sirdaryo, Guliston tumanlari va Guliston shahridan kelgan sport maktablari hamda sport klublari tarkibidagi yoshlar 10 ta vazn toifasida g‘oliblik uchun kurash olib bordi.
Musobaqa yakunida g‘olib va sovrindorlar medal, diplom va maxsus sport liboslari bilan taqdirlandi hamda “Yangi O‘zbekiston – Olimpiya cho‘qqilari” musobaqasining viloyat bosqichiga yo‘llanma oldi.
