Sinquefield Cup 2025: Nodirbek Abdusattorov startda mag'lub bo‘ldi
AQShning Sent-Luis shahrida mukofot jamg‘armasi 350 ming dollarga teng bo‘lgan Sinquefield Cup 2025 turniri start oldi. Grand Chess Tour’ning yakuniy klassik bosqichi aylana tizimda 9 turdan iborat bo‘lib, 29 avgustgacha davom etadi. Bu bosqich GCT ochkolari uchun so‘nggi imkoniyat hisoblanadi.
Birinchi turda o‘zbekistonlik grossmeyster Nodirbek Abdusattorov amerikalik Levon Aronyanga qarshi o‘yinda mag‘lubiyatga uchradi. Uchrashuv to‘rt soatdan oshiq davom etdi va Nodirbek vaqt tanqisligi sabab endshpil bosqichida xatoga yo‘l qo‘ydi. Shu tariqa, Aronyan bir necha kun oldin Abdusattorovdan blitsdagi ikki mag‘lubiyati uchun revanj oldi.
Kunning eng yirik g‘alabasi hind grossmeysteri Rameshbabu Pragg’nanandha hisobiga yozildi. U vatandoshi, amaldagi jahon chempioni Gukesh Dommarajuni mag‘lub etdi. Qolgan uchta bahsda raqiblar durangga rozi bo‘lishdi.
Sinquefield Cup 2025. 1-tur natijalari:
• Sem Sevian (AQSh) – Uesli So (AQSh) – ½:½
• Maksim Vashye-Lagrav (Fransiya) – Alireza Firuzja (Fransiya) – ½:½
• Nodirbek Abdusattorov (O‘zbekiston) – Levon Aronyan (AQSh) – 0:1
• Rameshbabu Pragg’nanandha (Hindiston) – Gukesh Dommaraju (Hindiston) – 1:0
• Fabiano Karuana (AQSh) – Yan-Krishtof Duda (Polsha) – ½:½
2-tur juftliklari (22:00, Toshkent vaqti):
• Pragg’nanandha – Karuana
• Aronyan – Sevian
• So – Vashye-Lagrav
• Firuzja – Duda
• Gukesh – Abdusattorov
