Shirinda yangi universal sport zali foydalanishga topshirildi
Shirin shahrida sport infratuzilmasini rivojlantirish yo‘lidagi yana bir muhim loyiha muvaffaqiyatli yakunlanib, zamonaviy universal sport zali foydalanishga topshirildi. Mazkur inshoot 2025-yilgi “Tashabbusli byudjet” loyihasining 2-mavsumi doirasida g‘olib bo‘lgan sport maktabi uchun barpo etildi.
Universal sport zali qurilishi uchun jami 2 milliard 500 million so‘m mablag‘ yo‘naltirilgan bo‘lib, sportchilar uchun yanada qulay sharoitlar yaratish maqsadida Shirin shahar hokimligi tomonidan qo‘shimcha ravishda 500 million so‘m mablag‘ ajratildi. Natijada zamonaviy talablarga javob beradigan, barcha zarur sharoitlarga ega sport majmuasi bunyod etildi.
Yangi sport inshooti 18x36 metr o‘lchamdagi keng sport zalidan iborat bo‘lib, unda sportchilarning mashg‘ulotlari uchun qulay va xavfsiz muhit yaratilgan. Shuningdek, majmuada yuvinish va kiyinish xonalari, tibbiyot xodimlari hamda murabbiylar uchun alohida xonalar tashkil etildi. Bu esa mashg‘ulotlar jarayonini samarali va tizimli tashkil etish imkonini beradi.
