Shaxmat. Nodirbek Abdusattorov: “Juda xursandman”
Blits bo'yicha jahon chempionatida kumush medalni qo‘lga kiritgan Nodirbek Abdusattorov finaldan keyingi intervyusida hissiyotlari bilan o‘rtoqlashdi.
“Natijamdan juda xursandman. Saralash bosqichida tay-breklar tomondan omad ham bo‘ldi. Eng asosiysi Top-4ga kirishning o‘zi juda katta omad. Finalga chiqqanimdan ham xursandman, oxirigacha bor kuchimni berdim. Rostini aytsam, g'olib bo'lishimga ozgina qoldi,” — dedi Nodirbek.
Pley-offga chiqish formatiga to‘xtalib, u shunday fikr bildirdi: “Agar 8 ta yo‘llanma bo‘lsa, albatta osonroq bo‘lardi. Top-4 tizimi ba’zan juda keskin va biroz ‘tasodifiy’ ham bo‘lib ketadi. Buni muxlislar o‘zi hal qilsa ham bo‘ladi.”
Finaldagi burilish nuqtalari haqida esa Nodirbek ochiq gapirdi: “O‘zimni yaxshi his qilayotgandim. Ikkinchi o‘yinda uning imkoniyatlarini past baholadim — pozitsiya durangga yaqin edi, lekin u juda aniq o‘ynadi. Oxirgi o‘yinda ham vaziyat keskin edi: tashabbus uchun piyoda qurbonlik qildim, ammo aniq davomni topa olmadim. Endshpil menga biroz qiyinroq edi va u oxirida o‘z imkoniyatidan foydalandi. Magnusni tabriklayman.”
