Sharjah Masters. Nodirbek Abdusattorov bir sutkada ikki davlatda ikki uchrashuv o‘tkazdi

Boshqa sport turlari 19 may 2025 da 00:00

Bakradze Iman

Redaktor

18-may kuni BAAning Sharja shahrida shaxmat bo‘yicha nufuzli Sharjah Masters 2025 xalqaro turniri boshlandi. Mukofot jamg‘armasi 73 000 AQSH dollarini tashkil etgan ushbu musobaqaning “Masters” guruhiga to‘rt nafar yurtdoshimiz — Nodirbek Abdusattorov, Jahongir Vohidov, Muhiddin Madaminov va Ortiq Nighmatov qo‘shilib, sovrinli o‘rinlar uchun kurashni boshladi.

Qizig‘i shundaki, Nodirbek Abdusattorov bir sutka ichida ikki davlatda ikki musobaqada ishtirok etdi. U 17-may kuni Ruminiya poytaxti Buxarestda yakuniga yetgan turnirning so‘nggi turida o‘ynagan bo‘lsa, 18-may kuni allaqachon Sharja shahrida yangi musobaqada g‘oliblik uchun bahs olib bordi. U Sharjah Masters turnirida birinchi raqam ostida tasniflangan bo‘lib, 1-turda hindistonlik grossmeyster Panayappan Sethuraman’ga qarshi qora donalarda o‘ynadi. Qiyin vaziyatga tushib qolganiiga qaramay, Abdusattorov murakkab pozitsiyadan chiqib ketishga muvaffaq bo‘ldi va durang qayd etdi.

Turnirning 1-turida shaxmatchilarimizdan faqat Jahongir Vohidov mag‘lubiyatga uchradi. U oq donalarda Eron vakili, musobaqaning uchinchi raqamli ishtirokchisi Amin Tabatabayiga qarshi o‘ynadi va imkoniyatni boy berdi. Qolgan ikki grossmeysterimiz — Muhiddin Madaminov va Ortiq Nighmatov o‘zlaridan yuqori reytingga ega raqiblariga qarshi durangga erishishdi.

O‘zbekistonlik shaxmatchilarning 1-turdagi natijalari:
Panayappan Sethuraman (Hindiston) – Nodirbek Abdusattorov — 0,5:0,5
Jahongir Vohidov – Amin Tabatabay (Eron) — 0:1
Muhiddin Madaminov – Syanuy Syu (Xitoy) — 0,5:0,5
Ortiq Nighmatov – Pranav Anand (Hindiston) — 0,5:0,5

19-may kuni bo‘lib o‘tadigan 2-turda Nodirbek Abdusattorov oq donalarda yana bir hindistonlik grossmeyster — Aditya Mittalga qarshi o‘ynaydi. Muhiddin Madaminov esa qora donalarda gretsiyalik Nikolas Theodorou, Ortiq Nighmatov — Sankalp Gupta (Hindiston), Jahongir Vohidov esa serbiyalik ayol grossmeyster Teodora Injatsga qarshi qora donalarda bahs olib boradi.