«Samarkand Marathon-2025» g'oliblari taqdirlandi
“Samarkand Marathon-2025” an'anaviy xalqaro xayriya marafonining asosiy bellashuvlari yakunlandi.
Musobaqada ishtirokchilar 5, 10, 21.1, 42.2 kilometr masofalarni bosib o'tishdi.
Natijalarga ko'ra, 5 kilometrdagi poygada erkaklar bahsida hamyurtimiz Alisher Axmatullaev, ayollar o'rtasida Darya Andropova marraga birinchi bo'lib yetib keldi.
10 kilometr musobaqada erkaklar bahsida yaponiyalik Yuta Shitara, ayollar bellashuvida rossiyalik Anastasiya Slichenkova tengsiz deb topildi.
21,1 kilometr masofaga o'tkazilgan poygada rossiyalik sportchilar Rinas Ahmadeyev hamda Sofiya Kameneva g'olib bo'ldi.
42,2 kilometr masofadagi bahslarda surxondaryolik Shohrux Davlatov birinchi o'rinni egalladi. Ayollar bahsida esa keniyalik Jasinta Chepkoech finishga birinchi bo'lib yetib keldi.
Marafonda turli yosh toifasida va imkoniyati cheklangan fuqarolar o'rtasida ham g'oliblar aniqlandi. Musobaqa g'oliblariga pul mukofoti va esdalik sovg'alari topshirildi.
