Ravshan Tolibov: «Ishonamanki, jamoamiz yangi mavsumni g‘alabalar bilan boshlaydi»
Oliy liganing 2026/2027 mavsumiga qur’a tashlash marosimidan so‘ng «Sayxun» jamoasi jismoniy tayyorgarlik bo‘yicha murabbiyi Ravshan Tolibov o‘z fikrlari bilan o‘rtoqlashdi.
«Qur’a tashlash marosimi ancha yaxshi o‘tdi. Jamoalar dastlabki turdagi raqiblarini bilib olishdi. Hozirda hamma ishtirokchilar yangi mavsumga yaxshi tayyorgarlik ko‘rmoqda. Nasib qilsa, sentyabr oyining dastlabki haftasidan boshlab Oliy liga bellashuvlari boshlanadi.
Jizzax shahrida mezbonlik qiladigan tur bahslar qiziqarli o‘tishiga shubha yo‘q. Dastlabki turdagi raqiblarimiz ancha yaxshi. Ular ham mavsumni yuqori notada o‘tkazish uchun biz kabi puxta hozirlik ko‘rmoqda, tarkib shakllantirilmoqda. «Sayxun» jamoasi ham o‘yinlarga qadar yanada yaxshi holatda bo‘ladi. Tayyorgarligimiz reja asosida davom etmoqda. Ishonamanki, mavsumni yaxshi boshlaymiz va g‘alabalarimiz bilan muxlislarimiz, yaqinlarimizni xursand qilamiz. Yangi mavsumda barcha jamoalarga omad tilab qolaman», — dedi Tolibov klub matbuot xizmatiga bergan intervyusida.
