«Pantera Sport Club» Qozog‘istondagi turnirda umumjamoa hisobida 1-o‘rinni egalladi
Uchinchi bor tashkil etilgan ushbu an’anaviy xalqaro musobaqada Qozog‘iston, O‘zbekiston va Qirg‘iz Respublikasidan 1000 nafarga yaqin yosh dzyudochilar medallar yzlida o‘zaro bellashishdi. Turnir to‘rtta yosh toifasi - 2010-2011, 2012-2013, 2014-2015 va 2016-2017 yillarda tug‘ilgan o‘smirlar va kichik yoshdagi o‘smirlar o‘rtasida tashkil etildi.
Quvonarlisi, «Abilayxan Open Cup» turnirida yurtimiz sharafini himoya qilgan Bobur Rizayev va Abdulbosit Abduvahobov murabbiyligidagi «Pantera Sport Club» klubi tarbiyalanuvchilari 6 ta oltin, 4 ta kumush, 2 ta bronza medali bilan umumjamoa hisobida 1-o‘rinni egallashdi. Qozog‘istonning "Ippon Judo Club" va sport maktab-internati jamoalari kuchli uchlikda joy olishdi.
Ushbu g‘alaba O‘zbekiston dzyudo federatsiyasining ustuvor yo‘nalishlarni to‘g‘ri belgilaganining yorqin ifodasi bo‘ldi. Bugungi kunda klub tizimini rivojlantirish strategik vazifa hisoblanadi: har bir viloyatida zamonaviy ixtisoslashtirilgan zallar qurilgan bo‘lib, ularda minglab bolalar dzyudo sir-asrorlarini o‘rganishmoqda. Muntazam klub turnirlari sog‘lom raqobatni yaratadi, ommaviylikni kuchaytiradi va kelajakdagi chempionlar avlodini tayyorlaydi.
Ma’lumot uchun, ushbu klub tarbiyalanuvchilarining aksariyati poytaxtimizdagi 102-umumta’lim maktabi hududida O‘zbekiston dzyudo federatsiyasi tashabbusi bilan bunyod etilgan sendvich panelli, ixtisoslashtirilgan dzyudo zalida shug‘ullanishadi.
