O‘zbekiston va Vengriya Paralimpiya yo‘nalishida hamkorlikni kuchaytiradi
Bugun, 30 may kuni O‘zbekiston Milliy Paralimpiya qo‘mitasi raisi Muxtorxon Tashxodjayev Vengriyaning mamlakatimizdagi Favqulodda va Muxtor elchisi janob Jo‘zef Roja bilan uchrashuv o‘tkazdi.
Suhbat chog‘ida ikki davlat o‘rtasida Paralimpiya yo‘nalishidagi mavjud hamkorlik va uni yanada rivojlantirish istiqbollari muhokama qilindi. Xususan, kelgusida Vengriya Milliy Paralimpiya qo‘mitasi bilan hamkorlikda qo‘shma o‘quv-mashg‘ulot yig‘inlarini tashkil etish, para suzish, aravachada qilichbozlik kabi Vengriyada keng rivojlangan sport turlari bo‘yicha mutaxassislar malakasini oshirish kurslarini o‘tkazish, shuningdek, Vengriya tajribasi asosida metodik qo‘llanmalar tayyorlash masalalari ko‘rib chiqildi.
Uchrashuv yakunida tomonlar Paralimpiya sohasidagi hamkorlikni yanada chuqurlashtirish bo‘yicha kelishuvga erishdi.
