O‘zbekiston Universiada qahramonlarini tantanali kutib oldi
Germaniyada bo‘lib o‘tgan Reyn-Rur–2025 Butunjahon yozgi Universiadasida muvaffaqiyatli ishtirok etgan O‘zbekiston delegatsiyasi Vatanga qaytib keldi. Islom Karimov nomidagi Toshkent xalqaro aeroportida sportchilarimiz uchun tantanali kutib olish marosimi tashkil etildi. Unda Prezidentning sport masalalari bo‘yicha vakili Odil Abdurahmonov, Sport vazirligi, Oliy ta’lim, fan va innovatsiyalar vazirliklari rahbarlari, Milliy Olimpiya qo‘mitasi vakillari, jamoatchilik hamda ommaviy axborot vositalari xodimlari ishtirok etdi.
Tadbir davomida rasmiylar yosh sportchilarimizni tarixiy yutuq bilan tabriklab, ularga kelgusida yanada ulkan muvaffaqiyatlar tiladilar.
Ma’lumot uchun, 16–27 iyul kunlari o‘tkazilgan mazkur nufuzli musobaqada O‘zbekiston delegatsiyasi 4 ta oltin, 4 ta kumush va 7 ta bronza medali bilan 113 davlat orasida umumjamoa hisobida 13-o‘rinni egalladi. Bu — terma jamoamizning Universiada tarixidagi eng yaxshi natijasidir.
