O‘zbekiston suv sporti delegatsiyasi Singapurdan qaytdi
4 avgust kuni Toshkentdagi Islom Karimov nomidagi xalqaro aeroportda “Uzbekistan Aquatics” federatsiyasi rahbariyati Singapurda 11 iyuldan 3 avgustgacha bo‘lib o‘tgan jahon chempionatidan qaytgan milliy terma jamoamizni tantanali kutib oldi.
O‘zbekiston delegatsiyasi musobaqada munosib ishtirok etib, yuqori saviyada tayyorgarlik va jahon tajribasini namoyish etdi. Ayniqsa, milliy termaning yetakchi sportchilaridan biri Eldorbek Usmonovning natijalari alohida e’tirof etildi.
Chempionat oldidan Usmonov Germaniyadagi yozgi Universiadada muvaffaqiyatli ishtirok etib, kumush va bronza medallarga ega chiqqan, shuningdek, yangi milliy rekordlarni o‘rnatgan edi. Bu natijalar uning barqaror rivojlanayotgan sport yo‘lining muhim bosqichiga aylandi.
Federatsiya rahbariyati Eldorbek Usmonovni yuqori natijalari bilan tabriklab, uning professionalligi va intilishiga alohida urg‘u berdi hamda kelgusi startlarda omad tiladi.
Shuningdek, terma jamoaning umumiy natijalari ham ijobiy baholandi — sportchilarning salohiyati va xalqaro musobaqalarga tayyorgarligi yana bir bor namoyon bo‘ldi.
