O‘zbekiston dzyudo federatsiyasi Yaponiya bilan hamkorlikni kengaytirmoqda
O‘zbekiston dzyudo federatsiyasi delegatsiyasi Yaponiyada amaliy tashrif bilan bo‘lib turibdi.
Tashrif doirasida Kokushikan universiteti rahbariyati bilan muzokaralar o‘tkazilib, O‘zbekistonda dzyudoni yanada rivojlantirish, xalqaro hamkorlikni kengaytirish va ilg‘or tajriba almashish istiqbollari muhokama qilindi.
Uchrashuvda O‘zbekiston tomonidan O‘zbekiston dzyudo federatsiyasi hududiy federatsiyalar bilan ishlash bo‘limi boshlig‘i Baxtiyor Yuldashev va Surxondaryo viloyati dzyudo federatsiyasi raisi To‘lqin Valiyev ishtirok etdi.
Kokushikan universiteti tomonidan muzokaralarda Jismoniy tarbiya fakulteti dekani, professor, erkaklar va ayollar dzyudo klublari direktori Xitosi Furuta, Jismoniy tarbiya fakulteti dots.nti Yasutaka Narita hamda universitet Xalqaro markazi Xalqaro aloqalar bo‘limi vakili Riko Mukay qatnashdi.
Uchrashuv yakunida tomonlar ikki tomonlama hamkorlikni kengaytirish, qo‘shma o‘quv-mashg‘ulot yig‘inlarini tashkil etish, murabbiylar va sportchilar o‘rtasida tajriba almashish, shuningdek, O‘zbekiston dzyudo federatsiyasining hududiy bo‘linmalarida ishlash uchun yaponiyalik mutaxassislarni jalb qilish bo‘yicha kelishuvlarga erishdi.
Kelishuvlarning amalga oshirilishi dzyudo sohasida O‘zbekiston-Yaponiya hamkorligini mustahkamlashda navbatdagi qadam bo‘ladi hamda mahalliy mutaxassislar malakasini oshirish va milliy dzyudo maktabini yanada rivojlantirishga xizmat qiladi.
