O‘zbekiston dzyudo federatsiyasi tomonidan Xalqaro dzyudo kuni keng nishonlandi
Poytaxtimizdagi 17-umumta’lim maktabi hududida joylashgan Olimpiada chempioni Diyora Keldiyorova dzyudo zalida Xalqaro dzyudo kuniga bag‘ishlangan bayram tadbiri o‘tkazildi.
Bayramona ruhda o‘tgan tadbirda O‘zbekiston Milliy olimpiya qo‘mitasi Bosh kotibi Oybek Kasimov, O‘zbekiston dzyudo federatsiyasi mas’ullari, murabbiylar, dzyudochilar, ularning ota-onalari va ommaviy axborot vositalari xodimlari ishtirok etishdi.
"Tinchlik" shiori ostida o‘tkazilgan bu yilgi tadbir doirasida daraxt ham ekildi. Diyora Keldiyorova, Davlat Bobonov, Alisher Yusupov, Muzaffarbek To‘raboyev singari Olimpiya o‘yinlari g‘olib va sovrindorlari kelajak avlod uchun yerga nihol qadashdi. Ko‘chat yoniga uning muallifi ham yozib qo‘yildi.
Yosh dzyudochilarning ko‘rgazmali chiqishlari tadbiriga o‘zgacha kayfiyat bag‘ishladi. An’anaga ko‘ra bayram torti mehmonlarga ulashildi. Diyora Keldiyorova yosh dzyudochilar bilan birga suratga tushdi, ularning quvonchiga sherik bo‘ldi.
