O‘zbek jang san’ati bo‘yicha O‘zbekiston chempionati o‘tkazildi
O‘zbekiston davlat jismoniy tarbiya va sport universiteti manejida milliy sport turimiz —O‘zbek jang san’ati bo‘yicha o‘smirlar, yoshlar va kattalar o‘rtasida O‘zbekiston chempionati bahslari bo‘lib o‘tdi.
Ushbu sport turi bo‘yicha dastlabki mamlakat chempionatida Qoraqalpog‘iston Respublikasi, Toshkent shahri hamda barcha viloyatlardan 1000 nafardan ortiq sportchilar O‘zbek jang sana’tining "Bellashuv" yo‘nalishi bo‘yicha kuch sinashishdi.
Musobaqaning tantanali ochilish marosimida O‘zbek jang san’ati federatsiyasi raisi Po‘lat Usmonov, O‘zbekiston davlat jismoniy tarbiya va sport universiteti prorektori Sherzod Mirzanov va boshqalar ishtirok etib, sportchilarga omad tilashdi.
Yakuniy natijalariga ko‘ra, umumjamoa hisobida faxrli birinchi o‘rinni Toshkent viloyati jamoasi qo‘lga kiritgan bo‘lsa, ikkinchi o‘rinni Andijon va Buxoro viloyati jamoalari egalladi. Uchinchi o‘rin Sirdaryo hamda Jizzax viloyati sportchilariga nasib etdi.
