Ot sporti. Jahon chempionatiga yana bir yo‘llanma qo‘lga kiritildi: Sopotdagi musobaqa yakunlandi
14-iyun kuni Polshaning Sopot shahrida ot sportining to’siqlardan sakrash (konkur) yo’nalishi bo‘yicha CSI1* va CSIO4* toifalaridagi xalqaro musobaqalar yakuniga yetdi.
Musobaqaning so‘nggi kunida O‘zbekiston terma jamoasi a’zosi Abdullayev Feruz BALOUKATO laqabli otida 125 sm balandlikdagi to‘siqlar o‘rnatilgan CSI1* toifada ishtirok etdi. Kuchli raqobat ostida kechgan bahslarda sportchimiz munosib ishtirok etib, 11-o‘rinni egalladi.
Shuningdek, shu kuni Abdullayev Abdurahmon CABALLONE laqabli otida to’siqlar balandligi 160sm bo’lgan CSIO4* Gran-pri yo’nalishida qatnashdi. Musobaqa yakunlariga ko‘ra, hamyurtimiz eng kuchli 20 nafar chavandoz qatoridan joy olib, 18-o‘rinni band etdi.
Shu tariqa, Sopot shahridagi xalqaro musobaqalar O‘zbekiston vakillari uchun muvaffaqiyatli yakunlandi. Musobaqaning eng muhim natijalaridan biri Abdullayev Abdurahmonning jahon chempionatiga yo‘llanma qo‘lga kiritdi. Mazkur chempionat joriy yilning avgust oyida Germaniyaning Axen shahrida bo‘lib o‘tadi.
Eslatib o‘tamiz, bundan avval Bekzod Kurbanov ham jahon chempionati yo‘llanmasini qo‘lga kiritgan edi. Endilikda Axendagi jahon chempionatida O‘zbekiston sharafini ikki nafar sportchi — Bekzod Kurbanov va Abdullayev Abdurahmon himoya qiladi.
Sportchilarimizni muvaffaqiyatli ishtirok bilan tabriklaymiz va bo‘lajak jahon chempionatida ularga omad tilaymiz!
