Olimpiya shaharchasida “Audit va sport birligi” shiori ostida sport musobaqalari o‘tkazildi
Bugun poytaxtimizdagi Olimpiya shaharchasida O‘zbekiston Respublikasi Hisob palatasi, Sport vazirligi hamda hamkor tashkilotlar tomonidan “Audit va sport birligi” shiori ostida “Shaxmat”, “Arqon tortish”, “Armlestling”, “Stol tennisi”, “Darts” sport turlari bo‘yicha sport musobaqalari o‘tkazildi.
Musobaqaning ochiish marosimida O‘zbekiston Respublikasi Hisob palatasi raisining birinchi o‘rinbosari Mehriddin Abdullayev, Sport vaziri Adkham Ikramov ishtirok etdi.
Tadbirda ta’kidlanganidek, bugun audit sohasi xodimlari nafaqat moliyaviy intizom va shaffoflikni ta’minlash, balki jismonan faol, ma’nan barqaror va jamoaviy hamjihatlikka ega mutaxassis sifatida ham namoyon bo‘lmoqda.
Musobaqalarda poytaxtimizda o‘tkazilgan “Audit jarayonlarini raqamlashtirish va katta hajmli (Big data) ma’lumotlarni sun’iy intellekt orqali tahlil qilish” mavzusidagi xalqaro konferensiyaga tashrif buyurgan 30 dan ortiq davlatlarning audit tashkilotlari vakillari ishtirok etdi.
Tadbir davomida musobaqalarning faol ishtirokchilari munosib taqdirdlandi.
Mehmonlar Prezidentimiz tashabbuslari bilan barpo etilgan zamonaviy Olimpiya shaharchasidan o‘rin olgan zamonaviy sport inshootlari bilan ham yaqindan tanishdilar.
