Ohangaronda \"Turon Enduro Uzbekistan Cup 2025\" turniri bo'lib o'tadi

Boshqa sport turlari 17 iyn 2025 da 15:01

Ibrohim Jalolov

Redaktor

O‘zbekiston Milliy Avtomobil va Mototsikl Federatsiyasi (NAFKU), “AKKERMANN” kompaniyasi bilan hamkorlikda mamlakatimiz tarixidagi ilk mototsikl musobaqasi — Turon Enduro Uzbekistan Cup o‘tkazilishini mamnuniyat bilan e’lon qiladi. Ushbu musobaqa 2025-yil 9-10 avgust kunlari Toshkent viloyatining Ohangaron shahrida, “AKKERMANN” zavodi kareri hududida bo‘lib o‘tadi.

Bu noyob voqea mototsikl sporti va off-road yo‘nalishlarini sevuvchilar uchun haqiqiy bayramga, shuningdek, O‘zbekistonda va butun mintaqada enduro harakatining rivojlanishida muhim qadamlardan biriga aylanadi.

Musobaqa dasturi:

9-avgust — Saralash bosqichi (Super Enduro + Final poyga TOP-10 uchun)
Ishtirokchilar texnik jihatdan murakkab bo‘lgan maxsus trassada eng yaxshi vaqt uchun kurash olib boradilar. Saralash natijalariga ko‘ra asosiy poyga uchun start holati aniqlanadi.
Saralashda eng yaxshi 10 nafar rayder o‘rtasida stadion trassasida alohida tomoshabop final poygasi o‘tkaziladi va g‘olib maxsus sovrin bilan taqdirlanadi.

10-avgust — Asosiy poyga
Saralashdan o‘tgan barcha ishtirokchilar birinchi kundagi natijalarga asosan startga chiqadilar. Poyga Ohangaron sement kareri va uning atrofidagi murakkab va manzarali yo‘nalishda o‘tkaziladi. Marshrut barcha toifalar uchun yagona bo‘ladi va asta-sekin murakkablashib boradi — mashhur Sea to Sky formatiga o‘xshash tarzda.