Og'ir atletika. O‘zbekiston ayollar terma jamoasi tog‘ bag‘rida o‘quv-yig‘in mashg‘ulotlarini davom ettirmoqda
Qozog‘iston ayollar terma jamoasi bilan qo‘shma o‘quv-yig‘in mashg‘ulotlarini muvaffaqiyatli yakunlagan O‘zbekiston ayollar terma jamoasi bo‘lajak nufuzli musobaqalarga tayyorgarlikni izchil davom ettirmoqda.
Ayni kunlarda jamoa Toshkent viloyatining Bo‘stonliq tumanida, tog‘ bag‘rida joylashgan Akbar Jo‘rayev nomidagi sport mahorati maktabida navbatdagi o‘quv-yig‘in mashg‘ulotlarini olib bormoqda.
Bosh murabbiy Mahmud Tog‘oyev hamda yordamchi murabbiy Kamila Abdullayeva rahbarligida o‘tayotgan mashg‘ulotlarda sportchilarning jismoniy va funksional tayyorgarligini yanada oshirish, texnik-taktik mahoratini takomillashtirishga alohida e’tibor qaratilmoqda.
Yuqori tog‘ sharoitida tashkil etilgan yig‘in sportchilarning chidamliligi va musobaqalarga tayyorgarlik darajasini yanada mustahkamlashga xizmat qiladi. O‘quv-yig‘in mashg‘ulotlari 16-iyun sanasiga qadar davom etadi.
