Og'ir atletika. Murosasiz bahslar, yangi rekordlar — O‘zbekiston chempionatiga oz fursat qoldi
Yoshlar va kattalar o‘rtasidagi O‘zbekiston chempionati startiga sanoqli kunlar qolmoqda. Joriy yilgi mamlakat birinchiligi yangilangan nizom va mutlaqo yangi tashkiliy format asosida o‘tkaziladi.
Avvalo, vazn toifalarida muhim o‘zgarishlar amalga oshirildi. Endilikda musobaqalar ayollar va erkaklar o‘rtasida 8 tadan vazn toifasida tashkil etiladi. Mazkur yangilik xalqaro talablarga mos ravishda raqobat muhitini yanada kuchaytirish va sportchilar uchun teng sharoit yaratishga qaratilgan.
Shuningdek, dast ko‘tarish va siltab ko‘tarish yo‘nalishlarida alohida medallar topshiriladi. Jamoaviy hisob qo‘lga kiritilgan medallar umumiy yig‘indisi asosida aniqlanadi. Ushbu tizim har bir yo‘nalishdagi natijaning ahamiyatini oshirishga xizmat qiladi.
Joriy yilda mahalliy musobaqalarda ishtirok etuvchi jamoalar soni ham ortdi. Musobaqalarda jami 32 ta jamoa qatnashadi. Ular safida ilk bor Og‘ir atletika markazi jamoasi ham ishtirok etmoqda. Bu esa mamlakat birinchiligining ko‘lami va nufuzining yildan-yilga ortib borayotganini ko‘rsatadi.
Bellashuvlar Chirchiq Olimpiya markazining Og‘ir atletika zalida o‘tkaziladi. Yangilangan format, kengaygan jamoalar tarkibi va yuqori saviyadagi raqobat mamlakatimiz og‘ir atletikasi rivojida navbatdagi muhim bosqichni boshlab beradi.
