Og'ir atletika. Jahon chempionati–2026: to‘rtinchi kun yakunlari
Yoshlar o’rtasidagi Jahon chempionatining navbatdagi kuni ham ortda qoldi. Kutilganidek, -79 kg vazn toifasidagi bahslar keskin va murosasiz ruhda kechdi.
Mazkur vazn toifasida hamyurtimiz Boburmirzo Yoqubov muvaffaqiyatli ishtirok etib, o‘z faoliyatidagi navbatdagi muhim natijani qayd etdi. U jahon chempionatida kumush medalni qo‘lga kiritib, yutuqlari qatorini yana bir nufuzli sovrindorlik bilan boyitdi.
Yana bir vakilimiz Xikmatillo Xaydarovga esa musobaqada biroz omad yetishmadi. Sportchimiz siltab ko‘tarish bahslarida 179 kg va 184 kg natijalarni qayd etdi. Ikki kurash yakunlariga ko‘ra esa 334 kg natija bilan umumiy hisobda 4-o‘rinni egalladi. Ta’kidlash joiz, Xaydarov bronza medal sohibi — turkmanistonlik Didarbek Jumabayevdan atigi 1 kilogramm ortda qoldi.
Sportchilarimizga kelgusi musobaqalarda ham omad va zafarlar tilaymiz.
Ma’lumot uchun, 6-may kuni musobaqaning beshinchi kun bellashuvlari o‘tkaziladi. Unda yigitlar o‘rtasida -88 kg, qizlar o‘rtasida esa -77 kg vazn toifalarida g‘olib va sovrindorlar aniqlanadi. Ushbu kunda O‘zbekiston vakillari ishtirok etmaydi.
