Og'ir atletika. Batumi shahrida kattalar o‘rtasidagi Yevropa chempionatiga start berildi
Batumi shahrida kattalar o‘rtasidagi Yevropa chempionatiga start berildi
Bugundan Gruziyaning Batumi shahrida kattalar o‘rtasidagi Yevropa chempionati start oldi. Mazkur nufuzli musobaqada 51 mamlakatdan jami 368 nafar sportchi g‘oliblik uchun bahslarda ishtirok etmoqda. Shundan 193 nafari ayollar, 175 nafari esa erkaklar hisoblanadi.
Dastlabki kun dasturiga ko‘ra, ayollar o’rtasida -48 kg, -53 kg hamda 58 kg vazn toifalarida B guruh bahslari, shuningdek -53 kg vazn toifasi C guruh ishtirokchilari ham o’z omadlarini sinovdan o‘tkaziladi. Kun yakunida esa -48 kg va -53 kg vazn toifalarida A guruh doirasida medallar uchun kurashlar tashkil etiladi.
Ma’lumot o‘rnida, chempionat 26-aprelga qadar davom etadi va ushbu musobaqa joriy yilda Shotlandiyaning Glazgo shahrida bo‘lib o‘tadigan Hamdo‘stlik o‘yinlari uchun rasmiy saralash bosqichi hisoblanadi. Shu bois turnirda nafaqat Yevropa davlatlari, balki Hamdo‘stlik mamlakatlaridan sportchilar ham “mehmon” maqomida ishtirok etishmoqda. Ularning natijalari Yevropa chempionati umumiy hisobiga kiritilmaydi, biroq Glazgo-2026 reytingi uchun inobatga olinadi.
Musobaqa tafsilotlari bilan sizni muntazam ravishda tanishtirib boramiz.
