Octagon League 2025 yilda Oʻzbekistonda beshta turnir oʻtkazishni rejalashtirmoqda

Boshqa sport turlari 09 may 2025 da 04:46

Bakradze Iman

Redaktor

MMA boʻyicha Qozogʻistonning Octagon League promosheni joriy yilda Oʻzbekistondagi musobaqalar sonini oshirishni moʻljallagan. Bu haqda tashkilotning mamlakatimizdagi rasmiy vakili Parviz Abdumavlonov Fightback YouTube koʻrsatuvida maʼlum qildi.

— 2025 yil davomida Oʻzbekistonda beshta turnir oʻtkazish rejalashtirilgan. Octagon 72 — shu yildagi birinchi bosqich. Qolgan toʻrtta musobaqaning ikkitasi Toshkentda, ikkitasi esa viloyatlarda tashkil etiladi. Yozda Samarqandda, agar hammasi muvaffaqiyatli kechsa, kuzda Andijonda turnir oʻtkazilishi kutilmoqda, — dedi Abdumavlonov.

Octagon League’ning bu yilgi dastlabki musobaqasi 11 may kuni Toshkentda boʻlib oʻtadi.