Navoiyda “Yangi O‘zbekiston Olimpiya cho‘qqilari” musobaqasining dzyudo bo‘yicha mintaqaviy bosqichi bo‘lib o‘tdi
Yosh avlodning sportga bo‘lgan qiziqishini oshirish, ularning jismoniy va texnik salohiyatini namoyon etish maqsadida tashkil etilgan “Yangi O‘zbekiston Olimpiya cho‘qqilari” sport musobaqasining navbatdagi mintaqaviy bosqichi Navoiy viloyati Navbahor tumanida dzyudo yo‘nalishida o‘tkazildi.
Musobaqada G‘ozg‘on shahri, Navbahor, Konimex va Nurota tumanlaridan kelgan iqtidorli yosh dzyudochilar ishtirok etib, o‘z mahoratlarini namoyon etdilar. Bellashuvlar davomida sportchilarning texnik tayyorgarligi, chaqqonligi va aniqligi sinovdan o‘tkazildi.
Tadbirda Navoiy viloyati sport boshqarmasi bo‘lim boshlig‘i U. Qahhorov, Milliy Olimpiya qo‘mitasining Navoiy viloyatidagi hududiy bo‘linmasi ijrochi direktori Farhod Rahmonov, shuningdek, sportchi va murabbiylar ishtirok etdi.
Bellashuvlar yakunida eng yaxshi natija qayd etgan sportchilar diplom, medal va esdalik sovg‘alari bilan taqdirlandilar. G‘oliblar musobaqaning viloyat bosqichida ishtirok etish huquqini qo‘lga kiritdilar.