Navoiy viloyati - U-17 o'smirlar o'rtasida O'zbekiston chempioni
Joriy yilning 5–11-mart kunlari Navoiy viloyatida, “So‘g‘diyona” Jismoniy tarbiya va sport kompleksida voleybol bo‘yicha U-17 yosh toifasidagi o‘smirlar o‘rtasida O‘zbekiston chempionati bo‘lib o‘tdi.
Mazkur nufuzli musobaqada Qoraqalpog‘iston Respublikasi, Toshkent shahri hamda mamlakatimizning barcha viloyatlaridan tashrif buyurgan jami 14 ta jamoa chempionlik uchun bahs olib bordi. Bir necha kun davom etgan uchrashuvlar davomida yosh voleybolchilar yuqori sport mahorati, jamoaviy hamjihatlik hamda g‘alabaga bo‘lgan qat’iy intilishlarini namoyon etdilar.
Bellashuvlar murosasiz va qizg‘in ruhda o‘tib, har bir uchrashuv sport muxlislari va mutaxassislar tomonidan katta qiziqish bilan kuzatildi. Musobaqa yosh voleybolchilar uchun muhim tajriba maydoniga aylanishi bilan birga, kelajakda milliy terma jamoalar safiga munosib nomzodlarni aniqlashda ham muhim ahamiyat kasb etdi.
Chempionat yakunlariga ko‘ra quyidagi jamoalar sovrindorlar safidan joy oldi:
1-o‘rin — Navoiy viloyati jamoasi
2-o‘rin — Toshkent viloyati jamoasi
3-o‘rin — Sirdaryo viloyati jamoasi
Musobaqa g‘oliblari va sovrindorlari tashkilotchilar tomonidan diplom, medal, kubok hamda esdalik sovg‘alari bilan taqdirlandi. Ta’kidlash joizki, bunday musobaqalar yoshlar o‘rtasida voleybol sport turini keng ommalashtirish, iqtidorli sportchilarni aniqlash hamda milliy terma jamoalar uchun mustahkam zaxira shakllantirishda muhim o‘rin tutadi.
