Namanganda «Jismoniy tayyorgarlik darajasi» sport sinovlariga start berildi
Bugun yurtimiz bo'ylab 30 yoshdan 70 yoshgacha va undan katta yoshdagi fuqarolar o'rtasida "Jismoniy tayyorgarlik darajasi" sport sinovlarini qabul qilish jarayoniga ramziy start berildi.
Mazkur loyiha sog'lom turmush tarzini targ'ib qilish, aholining barcha qatlamlarini muntazam jismoniy faollikka jalb etish maqsadida yo'lga qo'yilgan.
Shu munosabat bilan Namangan shahridagi Barkamol avlod sport majmuasida ham sport sinovlarining ochilish marosimi o'tkazildi. Tadbirda viloyatning turli mahallalarida istiqomat qilayotgan fuqarolar, mahalla tizimi xodimlari, xotin-qizlar faollari, yoshlar va keksalar bir safda qatnashishdi.
Ishtirokchilar dastlab ommaviy badantarbiya mashqlarini bajarishdi, shundan so'ng jismoniy tayyorgarliklarini sinovdan o'tkazishdi.
