Namangan viloyatida “Yoshlar kuni” doirasida voleybol musobaqalari o‘tkazildi
Chust tumanida umumta’lim maktablari o‘quvchilari o‘rtasida voleybol bo‘yicha sport musobaqalari o‘tkazilib, yoshlar o‘rtasida sog‘lom turmush tarzini targ‘ib qilish hamda ularning sportga bo‘lgan qiziqishini oshirishga alohida e’tibor qaratildi.
Shuningdek, Uchqo‘rg‘on tumanida ham voleybol bo‘yicha musobaqalar tashkil etilib, tuman hududidagi 10-sonli hamda 45-sonli umumta’lim maktablari o‘quvchilari o‘rtasida “Tuman Ichki ishlar bo‘limi boshlig‘i kubogi” uchun bellashuvlar o‘tkazildi. Qizg‘in va murosasiz bahslar ostida kechgan musobaqalarning taqdirlash marosimida Uchqo‘rg‘on tuman IIB boshlig‘i, podpolkovnik U.B. Murodullayev ishtirok etib, “Yoshlar kuni” doirasida yoshlarni sportga jalb etish, ularning bo‘sh vaqtini mazmunli tashkil etish, zamonaviy kasb-hunar hamda xorijiy tillarni o‘rganishga rag‘batlantirishga qaratilgan tadbirlar muntazam o‘tkazib kelinayotganini ta’kidladi.
Musobaqa yakunida g‘olib va sovrindor jamoalar diplom, medal hamda esdalik sovg‘alari bilan taqdirlandi. Bu kabi sport tadbirlari yoshlar o‘rtasida voleybol sport turini keng ommalashtirish, sog‘lom turmush tarzini targ‘ib qilish hamda iqtidorli sportchilarni aniqlashda muhim ahamiyat kasb etmoqda.
