Milan–2026: Qishki Olimpiada uchun yangi medallar namoyish etildi
2026 yili Italiya Milan va Kortina-d’Ampezzo shaharlarida o‘tkaziladigan Qishki Olimpiya va Paralimpiya o‘yinlari uchun tayyorlangan medallar rasman namoyish etildi. Taqdimot bugun, 16 iyul kuni Venetsiya shahrida bo‘lib o‘tdi. Medallar ikki qismdan iborat bo‘lib, ular Olimpiya halqalari bilan bog‘langan. Ushbu g‘oya sportchilar va ularni qo‘llab-quvvatlovchilarning yo‘lini ifodalash maqsadida yaratilgan.
Dizaynda nafislik va barqarorlik uyg‘unlashgan bo‘lib, barcha medallar faqat qayta tiklanuvchi energiya manbalarida ishlovchi induksion pechlarda quyiladi.
Medallarni tayyorlash bilan Italiya Davlat moneta va poligrafiya instituti (IPZS) shug‘ullanadi.
Qishki Olimpiya o‘yinlari 6–22 fevral kunlari, Paralimpiya o‘yinlari esa 6–16 mart oralig‘ida o‘tkaziladi.
