Kurash – Xalqaro Harbiy Sport Kengashi (CISM)ning rasmiy sport turi sifatida e’tirof etildi!
Dunyodagi eng yirik sport tashkilotlaridan biri — Xalqaro Harbiy Sport Kengashi (CISM) Kurashni rasman o‘z taqvimidan joy olgan sport turi sifatida e’tirof etdi. Bu muhim qaror Shri-Lankaning Kolombo shahrida bo‘lib o‘tgan CISM Bosh Assambleyasida qabul qilindi.
1948 yilda tashkil etilgan va bosh qarorgohi Belgiyada joylashgan CISM – 140 ta a’zo davlatni birlashtirgan, harbiylar o‘rtasida sport orqali tinchlik va do‘stlikni targ‘ib qiluvchi nufuzli xalqaro tashkilot hisoblanadi.
Mazkur yutuq – Xalqaro Kurash Assosiatsiyasi (IKA), Sport vazirligi, O‘zbekiston Qurolli Kuchlari va O‘zbekiston Kurash Federatsiyasining izchil harakatlari, muzokaralari va hamkorligi samarasidir.
Bosh Assambleyada IKA Texnika direktori janob Ravi Kapur tomonidan tayyorlangan Kurash taqdimoti CISM rahbariyati tomonidan katta qiziqish bilan qabul qilindi va natijada Kurash CISM taqvimiga kiritildi.
CISM doirasidagi birinchi rasmiy Kurash musobaqasi — Kurash Challenge Cup — 2026 yil 5–6 sentyabr kunlari O‘zbekistonda o‘tkaziladi. Ahamiyatlisi shundaki, musobaqaning final kuni — 6 sentyabr — "Jahon Kurash kuni"ga to‘g‘ri keladi.
Endi Kurash nafaqat sport, balki turli xalqlar, madaniyatlar va armiyalar o‘rtasida do‘stlik ko‘prigi sifatida xizmat qiladi. 2026 yildagi rasmiy debyutni dunyo qiziqish bilan kutmoqda – bu kurashning intizom, an’ana va global birlikka asoslangan shonli tarixidagi yangi sahifa bo‘ladi.