Kurash. Sharqiy va Janubiy-Sharqiy Osiyo chempionatining qizlar bellashuvlari yakunlandi
2025 yil 30 sentyabr kuni Xitoy Taypeining Yangi Taypei shahrida Sharqiy va Janubiy-Sharqiy Osiyo chempionatining birinchi kungi bellashuvlari o‘tkazildi. Dasturga muvofiq, musobaqalar ayollar o‘rtasidagi barcha vazn toifalarida tashkil etildi: -48 kg, -52 kg, -57 kg, -63 kg, -70 kg, -78 kg, -87 kg va +87 kg.
Taipei Gymnasium sport majmuasida chempionatning rasmiy ochilish marosimi bo‘lib o‘tdi.
Marosimda IKA Bosh kotibi Muhammad Reza Nassiri, Xitoy Taypei Milliy Olimpiya qo‘mitasi va sport vazirligi vakillari so‘zga chiqib, ishtirokchilarga omad tiladilar. Ular kurash musobaqasi nafaqat iqtidorli sportchilarni aniqlash, balki xalqlar o‘rtasida do‘stlik va madaniy hamkorlikni mustahkamlashga xizmat qilayotganini ta’kidladilar.
Ochilishdan so‘ng milliy kuy va raqslar ijrosi sport bayrami kayfiyatini yanada chuqurlashtirdi.
Birinchi kungi bellashuvlar keskin va murosasiz ruhda kechdi. G‘olib va sovrindor sportchilar medal, diplom va qimmatbaho sovg‘alar bilan taqdirlandilar.
Ertaga chempionatning ikkinchi kuni dasturi doirasida erkaklar barcha vazn toifalari bo‘yicha bellashuvlar start oladi.
