Kurash. Qirg‘iziston chempionlari nomi aniqlandi
Bishkek shahridagi “Gazprom” sport majmuasida kurash bo‘yicha kattalar o‘rtasida Qirg‘iziston chempionati yuqori saviyada tashkil etildi. Musobaqada mamlakatning 8 ta viloyati, shuningdek Bishkek va O‘sh shaharlaridan tashrif buyurgan 400 nafarga yaqin kurashchi g‘oliblik uchun bahs olib bordi.
Qirg‘iziston Respublikasi Jismoniy tarbiya va sport agentligi, Milliy olimpiya qo‘mitasi, Noolimpiya sport turlari direksiyasi hamda Qirg‘iziston Kurash federatsiyalari hamkorligida o‘tkazilgan mamlakat chempionati bu yil ham murosasiz va qiziqarli bellashuvlarga boy tarzda kechdi.
Tantanali ochilish marosimida mamlakat sport rahbarlari, O‘zbekistonning Bishkek shahridagi elchixonasi vakillari, sport faxriylari, murabbiylar, sportchilar hamda ommaviy axborot vositalari xodimlari ishtirok etishdi.
Shuningdek, bellashuvlarni xalqaro talablar asosida yuqori saviyada boshqarib borish maqsadida O‘zbekiston Kurash federatsiyasining bir guruh tajribali hakamlari ham chempionatda ishtirok etib, qirg‘izistonlik hamkasblariga amaliy yordam ko‘rsatishdi.
Kun davomidagi keskin va shiddatli bahslar yakuniga ko‘ra, barcha vazn toifalarida chempion va sovrindorlar nomi aniqlandi. G‘oliblarga diplom, medal hamda tashkilotchilar tomonidan ta’sis etilgan qimmatbaho sovg‘alar tantanali ravishda topshirildi.
Mazkur chempionat yakunlariga ko‘ra shakllantiriladigan Qirg‘iziston milliy terma jamoasi a’zolari kelgusida xalqaro musobaqalarda mamlakat sharafini himoya qiladi.
