Kurash Islom birdamlik o‘yinlari dasturiga kiritildi
Xalqaro Kurash Assotsiatsiyasi (IKA) mamnuniyat bilan ma’lum qiladiki, Kurash sport turi joriy yilning 7-21 noyabr kunlari Saudiya Arabistonida bo‘lib o‘tadigan Islom birdamlik o‘yinlarida namoyish sporti sifatida kiritildi.
Bu muhim qaror Kurashning Islom birdamligi Sport Assotsiatsiyasi (ISSA)ga a’zo mamlakatlar orasida yanada keng targ‘ib etilishi va uning xalqaro sport maydonidagi nufuzini oshirish yo‘lidagi navbatdagi qadam bo‘ldi.
IKA Bosh kotibi Muhammad Reza Nasirining Osiyo va Afrikadagi barcha milliy Kurash federatsiyalariga yuborgan rasmiy xatida qayd etilishicha, ushbu musobaqada ishtirok etish imkoniyati barcha islom mamlakatlari federatsiyalari uchun ochiq hisoblanadi.
Tashkilotchilar bilan kelishuvga ko‘ra, har bir mamlakat delegatsiyasi uchun 6 nafar ishtirokchiga bepul turar joy va ovqatlanish ta’minlanadi. Ular 2 nafar murabbiy, 2 nafar erkak va 2 nafar ayol sportchidan iborat.
Kurash bellashuvlari Erkaklar –66 kg, –81 kg va ayollar uchun –57 kg, –70 kg vaz toifalarida bo‘lib o‘tadi.
Barcha ro‘yxatlar faqat Xalqaro Kurash Assotsiatsiyasi orqali qabul qilinadi. Milliy Olimpiya qo‘mitasi orqali ro‘yxatdan o‘tish talab etilmaydi.
