Kurash bo‘yicha XV Osiyo chempionatiga start berildi
Tojikiston Respublikasi poytaxti Dushanbe shahrida kurash bo‘yicha kattalar o‘rtasidagi XV Osiyo chempionatining dastlabki bellashuvlariga start berildi.
Musobaqa bahslariga mezbonlik qilayotgan “Dushanbe Tennis Palace and Water Sport Complex” bugun haqiqiy sport bayrami muhitiga burkandi. Chempionat munosabati bilan bayramona bezatilgan zamonaviy sport majmuasiga yuzlab muxlislar tashrif buyurmoqda. 3500 nafar tomoshabinga mo‘ljallangan arenadan Osiyoning eng kuchli polvonlari ishtirokidagi qizg‘in bahslar o‘rin olmoqda.
Bugun chempionatning birinchi kun dasturi doirasida erkaklar o‘rtasida -60 kg, -66 kg, -73 kg va -81 kg, ayollar o‘rtasida esa -70 kg, -78 kg, -87 kg va +87 kg vazn toifalarida g‘olib va sovrindorlar nomi aniqlanadi.
XV Osiyo chempionatida qit’aning 20 ga yaqin davlatidan kelgan sportchilar chempionlik va reyting ochkolari uchun kurash olib bormoqda.
