Konor Makgregor Maks Xolloueyga tahdid qildi: «U mutlaqo boshqa yirtqichga ro‘baro keladi»
Yarim yengil va yengil vazn toifalarida sobiq UFC chempioni, irlandiyalik mashhur jangchi Konor Makgregor AQShning Las-Vegas shahrida bo‘lib o‘tadigan «UFC 329» turniri doirasidagi Maks Xolloueyga qarshi jang oldidan o‘z g‘alabasiga ishonchi komilligini ma’lum qildi.
Shuningdek, u raqibini har tomonlama xavfli ekanligidan ogohlantirdi. Mazkur jang 12-iyul kuni o‘tkazilishi belgilangan.
«Men ancha tajribaliman. Hech kim men bilan bitta oktagonda qolishni istamaydi. Men har qanday holatda ham xavfliman. Sizni istalgan vaziyatdan nokautga uchratishim mumkin va aynan shuni rejalashtiryapman. Maks Xollouey oldida mutlaqo boshqa yirtqich turibdi. U buni to‘liq his qiladi», — deya Makgregorning so‘zlarini keltirmoqda X ijtimoiy tarmog‘idagi Championship Rounds sahifasi.
