Karting bo‘yicha O‘zbekiston ochiq turnirining III bosqichi yakunlandi
Toshkent shahridagi “Rohat” kartodromida “Vatanparvar” tashkiloti tomonidan karting bo‘yicha O‘zbekiston ochiq turnirining III bosqich musobaqasi o‘tkazildi.
Unda respublikamizning turli hududlaridan 60 nafardan ziyod sportchi “Mikro”, “Mini”, “Super mini”, “125 KADET”, “KZ”, “KF-OK”, “Patriot” (T4) va “Patriot” (U) sinflarida bellashdi.
Musobaqa natijalariga ko‘ra, “Mini” sinfida Kirill Konyuxov (Toshkent shahri), “Mikro”da Muhammadamin Azizov (Toshkent shahri), “125 KADET”da Daniil Shevsov (Toshkent shahri), “Super mini”da Matvey Mochalkin (Sirdaryo viloyati), “KF-OK”da Artyom Usheka (Toshkent viloyati), “KZ”da Ayder Haydarov (Toshkent viloyati), “Patriot” (T4)da Daniil Alimov (Toshkent shahri), “Patriot” (U)da Jobir Rahmatullayev (Namangan viloyati) birinchi o‘rinni egalladi.
Jamoaviy hisobda Toshkent shahri jamoasi birinchi, Toshkent viloyati jamoasi ikkinchi, Namangan viloyati jamoasi esa uchinchi o‘rinni qo‘lga kiritdi.
Musobaqa yakunida g‘olib va sovrindorlar “Vatanparvar” tashkilotining diplom, medal hamda esdalik sovg‘alari bilan taqdirlandi.
