Javohir Sindarov — Tepe Sigeman 2025 chempioni!
Shvetsiyaning Malmö shahrida o'tkazilayotgan nufuzli Tepe Sigeman 2025 turnirida hamyurtimiz Javohir Sindarov g'alabaga erishdi!
Aylana tizimida tashkil etilgan ushbu musobaqada dunyoning taniqli grossmeysterlari qatorida Sindarov ham yuqori saviyada o'yin ko'rsatib, barcha raqiblarini ortda qoldirdi. Ushbu turnirda mamlakatimizning ikkinchi raqamli shaxmatchisi sifatida ishtirok etgan Javohir 7 turlik bellashuvda 4,5 ochko to'pladi.
7-turda Sindarov qora donalarda ukrainalik shaxmat afsonasi Vasiliy Ivanchuk bilan durang o'ynadi. Bu natija unga chempionlikni ta'minlash uchun yetarli bo'ldi. Chunki turkiyalik asosiy raqib — Yagiz Erdog'mus ham o'z uchrashuvida, niderlandiyalik Ervin L'Ami'ga qarshi durang qayd etdi.
Shu tariqa, Javohir Sindarov o'z faoliyatida yana bir muhim yutuqqa erishib, Tepe Sigeman 2025 musobaqasining rasmiy chempioniga aylandi!
