Jahon chempionatining ilk kunida O‘zbekiston para dzyudochilari 1 ta oltin va 2 ta bronza medalini qo'lga kiritdi
Gruziyaning Tbilisi shahrida para dzyudo bo‘yicha Jahon chempionati start oldi hamda musobaqaning ochilish marosimi bo'lib o'tdi. Tadbirda Xalqaro Paralimpiya qo'mitasi (IPC) prezidenti, Xalqaro ko‘zi ojizlar sport federatsiyasi (IBSA) prezidenti, Osiyo Paralimpiya qo'mitasi vitse-prezidenti hamda qo'mita rahbarlari ishtirok etdi.
Musobaqaning birinchi kunida O‘zbekiston vakillari munosib ishtirok etib, delegatsiyamiz hisobiga 3 ta medalni taqdim etdi.
Xususan, Kemran Nurillayev oltin medalni qo‘lga kiritib, Jahon chempioni bo‘ldi. Shohrux Mamedov hamda Kumushxon Xodjayeva esa bronza medallariga sazovor bo‘ldi.
Bahslar yakunida g‘olib va sovrindorlarni taqdirlash marosimi bo‘lib o‘tdi. Unda Osiyo Paralimpiya qo‘mitasi vitse-prezidenti, O‘zbekiston Milliy Paralimpiya qo‘mitasi raisi Muxtorxon Tashxodjayev ham ishtirok etib, g‘olib va sovrindor sportchilarni taqdirladi.
Eslatib o'tamiz, musobaqa 27-sentabrga qadar davom etadi.
