Ikki terma jamoa - yagona g‘alaba! Osiyo chempionatida 32 ta medal!
Indoneziyada o‘tkazilgan kadetlar va yoshlar o‘rtasidagi Osiyo chempionati g‘olib va sovrindorlarini tantanali taqdirlash marosimi bo‘lib o‘tdi. O‘zbekiston terma jamoasi 32 ta medal, jumladan, 15 ta oltin medal qo‘lga kiritdi. Bu esa mamlakatimizning Osiyo dzyudosidagi yetakchi mavqeining yorqin tasdig‘i bo‘ldi.
Sportchi va murabbiylarga tashakkurnoma hamda pul mukofotlarini O‘zbekiston dzyudo federatsiyasi raisi Azizjon Kamilov, rais o‘rinbosari Zafar Qahramonov topshirdi.
Marosimda so‘zga chiqqan Azizjon Kamilov erishilgan g‘alabalar imkoniyatlarning chegarasi emasligini ta’kidladi: "Nafaqat Osiyoda yetakchilikni saqlab qolish, balki jahon dzyudosi cho‘qqilariga intilish kerak. Kadetlar va yoshlar - milliy terma jamoaning ertasi, o‘zbek dzyudosining kelajagi aynan ularning matonati, intizomi va mehnatsevarligiga bog‘liq."
Federatsiya rahbari sportchilarimizga Peruda bo‘lib o‘tadigan jahon chempionatida muvaffaqiyatli ishtirok etishlarini tilab, murabbiylar jamoasiga fidokorona mehnatlari uchun alohida minnatdorlik bildirdi.
