III Osiyo o‘yinlariga otlangan kadetlarimiz hamda ularning ota-onalari bilan uch tomonlama shartnoma imzolandi
O‘zbekiston dzyudo federatsiyasida Bahraynda o‘tkazilayotgan yoshlar o‘rtasidagi Osiyo o‘yinlarida yurtimiz sharafini himoya qiluvchi kadetlarimiz, terma jamoa bosh murabbiyi, dzyudochilarning shaxsiy murabiylari hamda ularning ota-onalari bilan uchrashuv tashkil etildi.
Unda Federatsiya raisi o‘rinbosari Kseniya Gulyamova so‘zga chiqib, kadetlarimiz oldida turgan musobaqaning mas’uliyati, ijobiy natija qayd etish uchun davlatimiz va federatsiya tomonidan barcha shart-sharoitlar yaratilganini aytdi.
Terma jamoalarimiz shifokori Aziz Qayumov esa bugungi kunda eng dolzarb bo‘lib turgan doping masalasida atroflicha tushuntirish berdi. Shuningdek, shifokorimiz dzyudochilarning vazn tashlash jarayoniga ham alohida e’tibor qaratdi. Bu bo‘yicha kerakli ko‘rsatmalarni berdi. Ortiqcha vazn sabab xalqaro musobaqalarda ishtirok eta olmagan dzyudochilarimiz bilan bog‘liq holatlar tanqid ostiga olindi.
Bu kabi holatlarga yo‘l qo‘ymaslik, ularning oldini olish maqsadida uch tomonlama - Federatsiya, ota-onalar va dzyudochilar ishtirokida shartnoma imzolandi. Unga ko‘ra, doping, vazn va tartib-intizomga amal qilish, maktab darslarini qoldirmaslik, umuman olganda hujjatdagi barcha talablarga rioya etish qonunlashtirib qo‘yildi. Shartnoma bandlari buzilgan holatda moliyaviy jarima qo‘llaniladi.
