Humoyun Toʻxtamurodov Qozogʻistonda jang qilib, raqibini birinchi raunddayoq nokautga uchratdi
Qozogʻistonning Olma-Ota shahridagi "Baluan-Sholak" majmuasida MMA boʻyicha Nomad Fighting 13 turniri oʻtkazilmoqda. Biz uchun ahamiyatlisi, ushbu turnirning preelim kardida engil vazn toifasidagi taniqli oʻzbekistonlik aralash jang san'ati ustasi Humoyun Toʻxtamurodov ringga chiqdi. Unga Rossiya vakili Dmitriy Yakovlev raqiblik qildi.
3 raundlik jangning ilk raundidayoq hamyurtimiz oʻng qoʻlda yoʻllagan kuchli zarbasi orqali Yakovlevni nokautga uchratdi va oʻz gʻalabasini rasmiylashtirdi. Musobaqaning markaziy jangi Qozogʻiston vakili Vasif Abbasov hamda Qirgʻizistonlik Samat Abdurahmonov oʻrtasida kechadi.
Bu jang orqali 26 yoshli Humoyun Toʻxtamurodov faoliyatidagi oʻn uchinchi gʻalabasini nishonladi. Uning hisobida 5 ta magʻlubiyat ham bor. Dmitriy Yakovlevning rekordi esa endi 5-9-0 koʻrinishida. U 2023 yilda boshqa bir sportchimiz — Amirkhon Alixoʻjayevga ham magʻlub boʻlgandi.
