Gandbol. Toshkentda xalqaro hakamlar o'quv kurslari boshlandi
Bugun O‘zbekiston gandbol federasiyasida Osiyo gandbol federasiyasi (AHF) shafeligida qit'amiz hakamlarining o‘quv kursi boshlandi.
Unda yetti davlatning 20 nafardan oshiq gandbol hakami AHF hakamlar qo‘mitasi raisi janob Saleh Bin Ashur (Birlashgan Arab Amirliklari) boshchiligida malakalarini yanada oshirishga kirishdi.
Ta'kidlash joiz, AHF ushbu xalqaro o‘quv kursini o‘tkazishni mamlakatimizga ishonib topshirishining o‘ziga xos sabablari bor. Zero, keyingi yillarda mamlakatimizda gandbol bo‘yicha jahon va qit'a miqyosidagi musobaqalar yuqori saviyada uyushtirilmoqda. Turli yosh toifasidagi jamoalarimiz esa sovrinli o‘rinlarni egallamoqda. Qolaversa, hakamlarimiz nufuzli xalqaro musobaqalar uchrashuvlarini yuksak darajada boshqarishmoqda. Tabiiyki, bular Xalqaro va Osiyo gandbol federasiyasi e'tirofiga sazovor bo‘lmoqda.
