Futzal. Tartib-intizom komissiyasining navbatdagi yig'ilishi tafsilotlari
O‘zbekiston Futzal federatsiyasi Tartib-intizom komissiyasining navbatdagi yig‘ilishi bo‘lib o‘tdi. Unda Oliy liganing 4-turiga oid uchta masala muhokama qilindi.
Oliy liga
OKMK — “Lokomotiv”
Oliy liganing 4-turi doirasidagi OKMK – “Lokomotiv” uchrashuvining 33-daqiqasida OKMK jamoasi o‘yinchisi Samuel Narsiso Ribeiro Costa to‘p uchun kurashsiz holatda raqib o‘yinchisining beliga tirsagi bilan zarba bergani uchun maydondan chetlatildi.
Tartib-intizom komissiyasi qaroriga ko‘ra, Samuel Narsiso Ribeiro Costaga 3 ta o‘yinga chetlatish (diskvalifikatsiya) va 1 (bir) million so‘m miqdorida jarima intizom choralari qo‘llanildi.
“Bunyodkor” — “Oil Star”
Oliy liganing 4-turi doirasidagi “Bunyodkor” – “Oil Star” jamoalari uchrashuvining 4-daqiqasida “Bunyodkor” jamoasining jismoniy tayyorgarlik bo‘yicha murabbiyi Jasur Sodiqov ikkinchi hakam sha’niga haqoratli so‘zlar ishlatgani uchun maydondan chetlatildi.
Tartib-intizom komissiyasi qaroriga ko‘ra, Jasur Sodiqovga 3 ta o‘yinga chetlatish (diskvalifikatsiya) intizom chorasi qo‘llanildi.
“Maksam-Chirchiq”
"Maksam-Chirchiq” jamoasi musobaqa Reglamentining 17.6 hamda 20.2-bandlari talablarini buzgan. Ungacha jamoa uchta tur yakunlariga ko‘ra rasmiy ogohlantirilgan bo‘lishiga qaramay, 4-turda ham Reglament talablarini bajarmagan.
Tartib-intizom komissiyasi qaroriga ko‘ra, Toshkent viloyati jamoasi Qarshi shahridagi turda o‘z shifokorisiz ishtirok etgani (Reglamentning 17.6-bandi) hamda Telegram, Instagram va Facebook ijtimoiy tarmoqlarida o‘zining rasmiy sahifalarini ochmasdan, klub faoliyatini yoritib bormaganligi (Reglamentning 20.2-bandi) uchun “Maksam-Chirchiq” jamoasiga 5 (besh) million so‘m miqdorida jarima intizom chorasi qo‘llanildi.
Kelgusida mazkur kamchiliklar takrorlansa, jamoaga nisbatan Oliy liga musobaqasidan chetlatish chorasi ko‘rilishi borasida ogohlantirildi.
